سفرچایی

                                                                                               روح اله دنیادیده حور
سفرچایی،دشمنلرون خار اولسون
میوه لرون باغلاروندا نار اولسون
یارپوزگـــُلی ایلده سنه یار اولسون
بوته لرون دفترینه واراق ویر
قیزلاروون ساچلارینا داراق ویر


بهار گلوب آغاج یاپراق آچوبدی
داغ داشداندا قارارییوب قاچیبدی
گون ایستیسین یر ئوزینه ساچیبدی
آل الووه آغاج گلین یولدا قال
ال طایفووی بیر لحظه ده یاده سال


سفرچایی، سنون دولی سویون وار
یول ایچینده درین درین قویون وار
قیراق گئتمه سنون یرون کویون وار
بیزلری ده یادووه سال آغلاما
سرین سویون بیزلریچون داغلاما



سنبلرده قیراقونده قـــــالوبدی
آغاجلاردا عکسین سووا سالوبدی
رعنا قدون ئورگیمی آلوبدی
دیب گوزَده سویون سنه قاتوبدی
بعضی لرده انسانلیقی آتوبدی



سفرچایی ، روزیگارد ا یالاندی
بو دنیادا یاخشی یامان قالاندی
یاخشی گونلر حیف اولاکی تالاندی
یادوندادی گللرووی ساتاردوق
کینه لری کدورتی آتاردوق



داغ داشوندا گــَون چیخار گل اولور
باغ باغاتون یاشیل چمنله دولور
آفت دیسه گللرونده تز سولور
بیر فیکر ائله آفت یلی دگمسون
آغاجلارون اوجا قدین اگمسون




سفرچایی،هجران غمی یاندیرار
ئورکلری اودلارا بویاندیرار
سنون سسون عالمی اویاندیرار
ترانه دی جوانلاردا یاتماسین
ئوز تپراقین هیچ زاماندا آتماسین